PEPO SUEVOS
ARTE: Teatro
ESTILO: Humor
FORMATO: Monólogo

Espectacular showman e monologuista que utiliza na súa posta en escea un toque salvaxe, enérxico e incluso algo macarra ao servizo da risa do público. Hábil improvisador e cun repertorio no que toca todos os temas existentes, Pepo Suevos non deixa indiferente a ninguén nos seus espectáculos. Os números en directo ou “corpo a corpo” son a súa especialidade, un formato co que xa leva dado case mil actuacións en Galicia e outras comunidades e no que pode presumir de ser un dos artistas galegos máis curtidos e experimentados.

Ademais da vagaxe por bares, salas, teatros e verbenas de toda Galicia, Pepo Suevos é recoñcido pola súa participación en series de televisión emblemáticas como Terra de Miranda (onde interpretou ao xa mítico taberneiro Metralla), Mareas vivas, Pratos combinados ou Os Atlánticos e programas de culto como O Show dos Tonechos. Da TVG deu o salto cara a outras canles de televisión estatal como Telecinco (traballou en series como Hospital Central ou M.I.R.) ou Antena 3 (Quart). No cinema, Pepo Suevos, que tamén traballa como guionista, ten participado xa en vinte longametraxes interpretando papeis de perfís moi variados máis aló do rexistro cómico, como Entre bateas, Trece badaladas, Pradolongo ou Agallas.