OS DOUS DE SEMPRE
ARTE: Teatro
ESTILO: Humor
FORMATO: Dúo cómico

Xosé Antonio Touriñán e Marcos Pereiro son dous actores de Culleredo (A Coruña) que levan máis de seis anos traballando como parexa cómica, co nome artístico de Os 2 De Sempre (O2DS). Baixo este título, teñen presentado varios espectáculos de humor, entre os que destaca As Cantareiras de Ardebullo, un número que acadou sona no programa Luar e no que contan a historia de dúas retranqueiras irmás, Nucha e Mucha, e os seus veciños da aldea. Outros espectáculos de Os 2 De Sempre son Orsay, no que ironizan sobre o mundo do fútbol, e A Comer con Xosé y Ramón, unha parodia da alta cociña.

Desde os seus inicios no teatro escolar, Touriñán e Pereiro percorreron as aldeas e vilas galegas cos seus espectáculos e monólogos. Por separado teñen participado en obras de teatro, series e programas de televisión e espazos radiofónicos como Padre Casares, Land Rober, Perdelo todo (Xosé A.), Terras de Miranda, Air Galicia ou a peza Final de película (Marcos). Pertencentes a unha nova xeración de humoristas, gústalles definir o seu traballo como “humor hiperenxebre” e próximo á xente.

Ademais, Os 2 De Sempre rexentan un local de espectáculos en Carral, a Sala The Star, onde organizan concertos, representacións teatrais, proxeccións, seráns e outros espectáculos, e acaban de crear a súa propia produtora audiovisual, AiraPro.